Бишкекке 3-4 күндө жылуулук толук берилет

Бишкек шаарына жылуулук берилсин деген буйрукка бүгүн, 17-октябрда мэр Азиз Суракматов кол койду.

Ушул сааттан тарта жылуулук жеткирүү ишканалары жабдууларды даярдап, сууну ысытууга киришет.

“Үйлөргө жылуулук толук кандуу жеткенче 3-4 күн убакыт керек”, – деп кошумчалашты мэриянын басма сөз кызматынан.

Алгач жылуулукту оорукана, бала бакча, мектеп сыяктуу социалдык мекемелер алат.

Норма боюнча сырттагы суук беш күн катары менен 8 градустан төмөн болсо, жылуулук берүү башталат.

Кыргызстандын аймагында аба ырайы бир аптадан бери суук тартып, жаан карга айланды. Ушул тапта да бирин-серин кар себелеп турат.

Өткөн аптанын соңунда Кыргызстанда аба ырайы кескин өзгөрүп, суук түштү. Азыр Бишкекте абанын температурасы 0 градус болуп турат, кар жаап жатат.

Анткен менен синоптиктер келерки аптанын аба ырайынын алдын ала божомолун жарыялап, күн дээрлик жылуу болорун айтууда.

Бизде көп көрүлгөн видеолор

Инфографика