Атактуу Кен Робинсондун «Баланын жөндөмүн өнүктүргөн креативдүү мектептер» китебинин кыргызчасы жарык көрдү

Атактуу Кен Робинсондун “Баланын жөндөмүн өнүктүргөн креативдүү мектептер” аттуу китебинин кыргызчасы жарык көрдү.  Аталган китеп буга чейин англис тилинен 15 тилде жарык көрсө, 16-болуп кыргызчага которулду.  

Адабият “Кереге” жалпы адамзаттык баалуулуктар фондунун демилгеси менен кыргызчаланды. Китеп ата-эне, мугалим, мектеп мүдүрү, коомдук ишмер жана саясатчыларга арналат. Кыргызчага Бакытбек Абдуллаев жана Кутманбек Мазарипов которуп, “Глобал принт” ЖЧК басмаканасынан басылып чыкты.

Китепте адамдын потенциалы менен чыгармачылыгын өнүктүрүүдө дүйнөгө таанымал эң таасирдүү адис Кен Робинсондун билим берүү тармагын трансформациялоо боюнча пикирлери камтылган. Автор индустриалдык доордун өндүрүмү эскилиги жеткен бүгүнкү билим берүү системасын замандын талабына жараша өзгөртүүгө убакыт келгенин жана аны ишке ашырууга болоорун далилдейт.

Кен Робинсон өзүнүн тажрыйбалары, байкоолору, мектептердин мыкты үлгүлөрү жана билим берүүнүн жаңычыл ыкмалары менен кеңири бөлүшөт. Окуучуга мектепти кызыктуу, жагымдуу кылуу менен баланын жөндөмдөрүн өнүктүрүп, мектептен кийинки жашоосуна даяр болуп жетилүүсүнө жол көрсөтөт. Китепте келтирилген үлгүлүү мисалдар жана пикирлер баласынын келечегин ойлогон ар бир адамды билим берүүнүн маңыз-максаты тууралуу кайрадан ойлонууга түртөт.

Автор Кен Робинсон Англия, Сингапур өлкөлөрүндө билим берүү реформаларын натыйжалуу ишке ашырып, бул тармактын глобалдык лидери катары таанылган. Кишинин потенциалын жана жөндөмдөрүн өнүктүрүү боюнча New York Times гезитинин бестселлер китептеринин автору. Fast Company тарабынан креативдүүлүк жана инновациялар боюнча дүйнөнүн эң алдыңкы 50 ойчулу тизмесине кирген. Европа менен Азиядагы өкмөттөрүнө, Fortune журналы аныктаган 500 эң ири компанияга жана эл аралык уюмдарга чыгармачыл ойлонуу, инновациялар боюнча консультант болгон. Улуу Британиянын Уорик университетинде сабак берип, азыр ардактуу профессор болгон кези. Престиждүү TED конференциясындагы “Do schools kill creativity?” (Мектептер талантты бууйбу?)  аттуу лекциясын 150дөн ашык өлкөдө 300 миллиондон ашык киши көрүп, TED тарыхында эң көп көрүлгөн тасма болуп келет.

Кен Робинсон 1950-жылы Ливерпулда туулган. Англияда Сэр наамын алган. Азыркы учурда Лос Анжелесте жашайт.

Бизде көп көрүлгөн видеолор

Инфографика

Пикир калтыруу

avatar
  Subscribe  
Notify of