Жээнбеков: Айтматовдун чыгармалары биз үчүн руханий компас

“Кыргыз жана орус тилдери Чыңгыз Айтматовдун эки канаты»,-деди Кыргызстандын президенти Сооронбай Жээнбеков бүгүн, 7-декабрда Москва шаарында кыргыз жазуучусу Чыңгыз Айтматовдун эстелигин ачуу аземинде.

Мамлекет башчысы бул маанилүү күн менен куттуктап жана эстеликти курууга катышкандардын баардыгына ыраазычылык билдирди.

Президент Сооронбай Жээнбеков Чыңгыз Айтматов даанышман жазуучу гана болбостон, глобалдык масштабдагы инсан, көп кырдуу талант экендигин өзгөчө белгиледи. Ал өзүн публицист, гуманист, философ, көрүнүктүү мамлекеттик жана коомдук ишмер, дипломат катары да көрсөтө алды.

«Муну улуу муун жакшы билет, ал эми жаштардын эсине салып коёюн. Өз кезегинде Чыңгыз Төрөкулович Россия Федерациясынын Люксембургдагы Атайын жана Ыйгарым укуктуу Элчиси болгон», -деди мамлекет башчысы.

Президент белгилегендей, ЮНЕСКОнун маалыматы боюнча, Чыңгыз Айтматов бүгүн чыгармалары эң көп тилдерге которулуп, китеп болуп чыккан Шекспир менен Толстойдон кийинки дүйнөлүк классик экени белгиленди. Анын китептери дүйнөнүн 176 тилине которулуп, Жер шарынын 128 өлкөсүндө 100 миллиондон ашык нуска менен басылып чыккан. Мисалы, жазуучунун «Жамийла» повести ондогон тилдерге которулган. Немец тилинде гана бул повесть 37 жолу кайра басылып чыкты.

«Анын даанышман ойлору, китептери, идеялары дайым биз менен. Татаал жана ыкчам өзгөрмөлүү дүйнөдө бизге руханий компас катары дайыма келечекке жол багыттайт», — деди Жээнбеков.

Эстеликтин ачылыш аземине Москва шаарынын мэри Сергей Собянин, Кыргызстандын жана Россиянын маданият министрлери жана башка расмий өкүлдөр катышты.

Москва шаарындагы Ч.Айтматовдун эстелигинин автору Азамат Абдрахманов, Россия тараптан архитектор — Сергей Павлов. Скульптура колодон куюлган. Анын бийиктиги постаментти эсептебегенде  — 2 м 70 см.

Эстелик Данилов районундагы Павлов көчөсү менен  Подольск шоссесинин кесилишинде, Чынгыз Айтматов атындагы скверде орнотулду.

 

Бизде көп көрүлгөн видеолор

Инфографика