Forbes: Казакстандык миллиардерлердин байлыгы көбөйдү

Forbes журналынын миллиардерлер тизмесине кирген Динара Кулибаева.

Казакстандык беш миллиардер америкалык Forbes журналынын быйылкы рейтингинде өз позицияларын кыйла жакшыртты. 

Рейтингде былтыр 776-орунга жайгашкан KAZ Minerals plc компаниясы менен “Казахмыс” корпорациясынын ээси Владимир Ким быйыл 424-орунга жазылды. Анын байлыгын бир жылдын ичинде бир жарым миллиард долларга көбөйүп, 4,6 миллиард долларга жеткен.

​Өлкө президенти Нурсултан Назарбаевдин ортончу кызы Динара менен күйөө баласы Тимур Кулибаевдердин байлыгы былтыркыга салыштырмалуу эч өзгөргөн эмес. Бирок былтыр 6,4 миллиард долларга бааланган байлыгы менен 729-орунга жазылган алар быйыл 715-орунга чейин көтөрүлгөн.

Кулибаевдердин үй-бүлөсүнүн эң ири активи “АЛМЭКС” компаниясы эсептелет. Ал аркылуу жубайлар Казакстандагы ири коммерциялык банкты көзөмөдөп келишет. Мындан тышкары алар мунай жана газ скважиналарын тейлөө менен алектенген компанияларга ээлик кылышат.

Тимур Кулибаев Казакстан ишкерлеринин “Атамекен” улуттук палатасынын төрагасы, Казакстандын мунайгаз ишканалары менен KAZENERGY энергетикалык комплексинин биримдигинин жана Улуттук олимпиада комитетинин башчысы. Мындан тышкары Казакстандын бокс федерациясын, Спорттун күрөш жана күч пайдаланылуучу түрлөрү конфедерациясын жетектейт. 2009-жылы Орусиянын «Газпром» компаниясынын директорлор кеңешинин курамына кирген. Динара Кулибаева атасы Нурсултан Назарбаев атындагы билим берүү фондун башкарат.

Казакстан президентинин иш башкармалыгынын мурдагы башчысы Булат Утемуратов рейтингде 645-орунга жазылган (былтыр 924-орунда болчу). Анын 2,6 миллиард долларды түзгөн капиталы бир жылдын ичинде 3,5 миллиард долларга жеткен. Анын бизнес-кызыкчылыктары кыймылсыз мүлк, телекоммуникация, медиа, банк секторлорун камтыйт. Forbes Утемуратов жакында эле Forte Bankка 400 миллион доллар салганын белгилеген.

ERG тоо-металлургия корпорациясынын ээлеринин бири Алижан Ибрагимовдун байлыгы өзгөргөн эмес. Ал былтыркыдай эле 2,3 миллиард долларды түзөт. Былтыр рейтингде 1070-орунга жазылган өзбек тектүү казакстандык ишкер быйыл 1008-орунга жайгашкан.

Forbes журналынын маалыматына караганда, казакстандык миллиардерлердин жалпы байлыгы бир жылдын ичинде эки миллиардан ашык суммага көбөйүп, 16,8 миллиард долларды түзгөн.

Бизде көп көрүлгөн видеолор

Инфографика