Алмазбек Атамбаевди УКМКга алып келишти (видео)

0

КСДПнын расмий өкүлү Кундуз Жолдубаева мурдагы президент Алмазбек Атамбаевди Улуттук коопсуздук боюнча мамлекеттик комитетке (УКМК) алып келишкенин «Азаттык» радиосуна билдирди. Ал өзүн Ички иштер министрлигине алып баратышканын кабарлады.

«Азаттык» радиосунун колуна тийген эксклюзивдүү видеоматериалдарга ылайык, Атамбаев анын үйүндө кармоо учурунда ички иштер министринин орун басары Курсан Асанов менен сүйлөшүп жатканын көрсө болот. Асанов анда Атамбаевдин жанындагы күзөтчүлөргө тийбей турганын айтып убада берди. Видеодон тараптар макулдашкандан кийин, чогуу-чаран машинеге отуруп кетип жатканын көрүүгө болот.

Мурдагы президент Алмазбек Атамбаевди кармоо операциясы бүгүн, 8-августта саат 16ларда башталган. Милиция темир дарбазаны чопкутталган машине менен сүзүп кирип, Атамбаевдин тарапташтарын короодон сыртка сүрүп чыгарган. Анда кулак тундуруучу, көздөн жаш агызуучу каражаттар колдонулганын «Азаттыктын» кабарчысы окуя болгон жерден кабарлаган.

7-августта мурдагы президент Алмазбек Атамбаевди кармоо операциясы ишке ашпай калган. Операция учурунда күч органдары менен мурдагы президенттин тарапкерлери кагылышып, бир нече киши жабыркады. Алардын арасында атайын кызматтын аскерлери жана милиция кызматкерлери бар. Кагылышта башына таш тийип, оор жараат алган Чүй милициясынын башчысы Самат Курманкуловго эки жолу операция жасалды. Дарыгерлер азырынча ал эсине келе элек экенин билдирип жатышат. Күч түзүмүнүн бир өкүлү курман болду.

Башкы прокуратура Кой-Таштагы окуя боюнча Жазык кодексинин алты беренесинин негизинде («Массалык башаламандык», «Бейбаштык», «Киши өлтүрүү», «Киши өлтүрүүгө аракет кылуу», «Бийлик өкүлдөрүнө карата зомбулук» жана «Туткунга алуу») кылмыш ишин козгоп, ИИМ сотко чейинки тергөө амалдары башталганын билдирди.

Булак: azattyk.org

Бизде көп көрүлгөн видеолор

Инфографика

Пикир калтыруу

avatar
  Subscribe  
Notify of