Дүйнөдө коронавирус жуктургандар 30 миллионду чамалады

“Worldometers” статистика сайтынын маалыматына караганда дүйнөдө коронавирус жуктурганы аныкталгандар 16-сентябрга карата 30 миллионду чамалады. Анын ичинен 21,5 миллиону айыгып кетсе, 940 миңдейи көз жумган.

Индияда коронавируска чалдыккандардын саны 16-сентябрда беш миллиондон ашты. 82 миңден көп адам көз жумду.

Ирандын Саламаттык сактоо министрлиги коронавирус кайра жайыла баштаганын эскертти. Мекеме билдиргендей, буга жарандардын санитардык эрежелерди сактабаганы жана саякаттоосу түрткү болууда. Иран Жакынкы Чыгыштагы коронавирус эң катуу жайылган мамлекеттердин бири. Ал жакта бул илдет 23 миңдей адамдын өмүрүн алды.

Европа мамлекеттеринин өкмөттөрү күзүндө коронавирусту жугузгандардын жана андан өлгөндөрдүн саны көп болушу мүмкүн экенин эскертип жатышат. COVID-19га чалдыккандардын саны Испания, Франция, Грецияда өсүүдө.

Коңшу Казакстанда соңку бир суткада 400дөй адам пневмония менен ооруканага түшкөн.

Бизде көп көрүлгөн видеолор

Инфографика